الناصرية اليوم | الموازنة والامطار وحركة الجدر
A- A A+

الموازنة والامطار وحركة الجدر

 بعد ما خرجنا من الميزانية الانفجارية “مولد بلا حمص” وبانت كل التصريحات هواء في شبك “صارت بيه دوخه اسم الله عليكم انه داعيكم حبزبوز” لاننا لم نجني الا الانفجارية منها، فيما ماعت الميزانية، ومن يومها والحزن خيم عليه ،”كلش ضايج وتعبان ومالي خلك الروحي” ،واحسست بانني لا اطيق اقرب الناس لي وهو نقالي  طبعا، لاني امام اتصالات ام حميزه تخونني شجاعتي فكيف بي امامها ،”ها شتردين مني بس لا بصل لو ثوم حتى فطم الخضارة كامت تحضرلي حضن يومية”

*ام حمزه: حبزبوز ياثوم يا بصل الانواء الجوية صرحت اليوم مطر كثيف وفيضان عنيف.

– حبزبوز: يا ام حمزه يا حياتي البصل والثوم  الج فدوه، انه غير صارلي اسبوع انكل جزم و لايلون ابو طبقتين و اجمع فلين من اصدقائي اصحاب المواد المنزلية عوفي الانواء الجوية صابتها عدوى من السياسيين يعمي ودخانته تفتل.

*ام حمزه : جبتلي جزمة بيضة لو سودة بداعتي.

-حبزبوز: ام حميزه هي جزمة بيضة وحدة و اخذاها اصاحبها الى بغداد بعد منين اجيب بيضة وبعدين هي جزمة قابل وردة جوري.

*ام حميزه: لعد جيبلي سوده ولايلون وفلينة ثلاجة 24قدم اريد اصعد الجهال وياي بالفيضان ، انت ما دير بالك عليهم وخصوصا علوش مريض من ايام بسكت المدارس الله لا يعطيهم .

– حبزبوز: هههههههه ام حميزه جبتلك جوب شفل ما يسويلج .

*ام حمزه: هذا حظي لاحكني على عافيتي ، اشو اني سمعت اكو استعدادات للمطر هذي الاستعدادات مباريات سباحة تجريبية لو شنو؟.

-حبزبوز:طبعا اكو استعدادات بس جاي يسوون احماء واحتمال بتموز يكونون مستعدين، وخصوصا ابو السبيس جاي يخزن سبيس لوقت الشدة.

*ام حمزة :ها سبيس حتى يدفنونه فد مرة ويتخلصون يصير هو تغسيل بالفيضان هو دفن بالسبيس بطانته منه وبيه .

-حبزبوز: لعد شلون هاي الحكومة الرشيدة حاضرة حتى بعد الممات خدمات ما بعد الموت وتحت شعار خدمة للمواطن وضيفي عليها من يمج  ط ن.

*ام حمزة: لعد بداعتي مايوزعونه لايلون بالحصة وكل نفر كونيه سبيس ,

-حبزبوز: هههههه شبيج فطيره عمي موازنة ماكو يكلك فتحوا القاصة لكوا الفلوس ماكلتها العثه وانت تعرفين الحكومة ما تصرف فلوس الا وفق الشريعة والشرع والحلال والحرام فبقت الفلوس بالقاصة ينفقون بيها على  مستحقيها فقط  وياها ط  ن ، وجان تصير عثة بالقاصة و تأكل الفلوس أيـــــــــ .

*ام حمزة: يا حلال ياحرام هاي العثه حوبت الشعب ما ستلم بس جاي ابو الحديد وحمس المفخخات.

-حبزبوز: ام حميزه انه احترمج لان انت اتابعين هذا الذهبي من يطلع على البغدادية ، طبعا حبا بالذهب وليس حبا بيه لذلك راح اطيج 10 من عشرة على سالفة الحديد .

*ام حميزه: حبزبوز انه احب المحللين السياسيين من يفيكون خصوصا اليرشحون على الانتخابات يبقون يفيكون على الناس يعتقدون العالم زواج ويطلعون كمش، حبزبوز ما خلص رصيدك انت صاير مبذر؟.

-حبزبوز: ام حمزه تاج راس البصل انه خطي على مودج بعدين انت المخابره .

*ام حمزة عزه طار رصيدي كله من وره المحطة السادسة والانواء الجوية حبزبوز اجر تكسي وتعال وجيب وياك كباب سفري لان الجدر احترك والبيت همين وبلغ الانواء الجوية خليهم يمطروها بسرعة لان ابو الاطفاء ،كريسو، مايلحك.